ހުޅުމާލޭގައި ހިނގި ނުރައްކާތެރި މާރާމާރީއަކާ ގުޅިގެން މީހަކު ހައްޔަރުކޮށްފި
ހުޅުމާލޭގައި ހިނގި ނުރައްކާތެރި މާރާމާރީއަކާ ގުޅިގެން މީހަކު ހައްޔަރުކޮށްފި އެވެ.
ފުލުހުންގެ ތަރުޖަމާން އެސިސްޓެންޓު ކޮމިޝަނާ އޮފް ޕޮލިސް މުހައްމަދު ޝިފާނު މިއަދު މީޑިއާތަކަށް ހިއްސާ ކުރިގޮތުގައި އެ މާރާމާރީއާ ގުޅިގެން 22 އަހަރުގެ ދިވެހި ފިރިހެނަކު ހައްޔަރުކޮށްފައިވެއެވެ.
ޖުލައި މަހުގެ އެއްވަނަ ދުވަހު ހުޅުމާލޭގައި ގުރޫޕަކުން ހިންގި ނުރައްކާތެރި މަރާމާރީއެއްގައި ދިވެހި ޒުވާނަކަށް ވަރަށް ބޮޑަށް އަނިޔާވެފައިވެއެވެ. އަދި އަނިޔާވި ޒުވާނާއަށް މިހާރުވެސް އަންނަނީ އައިޖީއެމްއެޗް ގައި ފަރުވާ ދެމުންނެވެ. ޖުލައި މަހުގެ 1 ވަނަ ދުވަހު ހިންގި އެ މާރާމާރީގައި އެ ޒުވާނާގެ ބޯ ފަޅައިގެން ގޮސް ސިކުންޑިއަށް ލޭއެޅި ބޮޑެތި ގެއްލުންތަކެއް ވެފައިވެއެވެ.
އަނިޔާވި ޒުވާނާގެ އާއިލާއިން ހާމަކުރިގޮތުގައި އޭނާގެ ހާލު މިހާރު ރަނގަޅުވަމުންދެއެވެ. ނަމަވެސް ލިބުނު އަނިޔާތަކުގެ ސަބަބުން ހިނގުމަށް ދަތިވެފައިވާ ކަމަށް އާއިލާއިން ބުނެ އެވެ.
އާއިލާއިންވަނީ އެ މާރާމާރީ ހިނގަން މެދުވެރިވި ސަބަބު ނޭނގުމާއި، މާރާމާރީ ހިންގި ގުރޫޕުން ދެވަނަ ފަހަރަށް އެ ޒުވާނާއަށް ހަމަލާއެއް ދީފާނެކަމުގެ ކަންބޮޑުވުން ފާޅުކޮށްފަ އެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
