އެސްޓީއޯގެ ފާމަސީތައް ތިން ދުވަހަށް ބަންދުކުރަނީ؛ ކުއްލި ހާލަތްތަކުގައި ބޭސް ލިބޭނެ އިންތިޒާމު ވަނީ ހަމަޖައްސާފައި

ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ހިންގަމުން އަންނަ ފާމަސީތަކުގެ ހިދުމަތްތައް އަލަށް އުފެއްދި "ސްޓޭޓް ފާމަސޫޓިކަލް އެންޑް މެޑިކަލް ސަޕްލައިސް ކޯޕަރޭޝަން ލިމިޓެޑް" (ސްޓޭޓް ފާމާ) އަށް ބަދަލުކުރުމުގެ މަސައްކަތަށް، ކުރިއަށް އޮތް ތިން ދުވަހު ފާމަސީތައް ބަންދުކުރަން ނިންމައިފިއެވެ.

އެސްޓީއޯ އިން ނެރުނު ބަޔާނެއްގައި ބުނެފައިވަނީ، މި ބަދަލާ ގުޅިގެން ކުރިއަށް ގެންދަންޖެހޭ އިންވެންޓްރީ ބެލުމުގެ މަސައްކަތް ކުރުމަށްޓަކައި ޖޫން މަހުގެ 24، 25 އަދި 26 މި ތިން ދުވަހު އެސްޓީއޯގެ ހުރިހާ ފާމަސީތަކެއް ބަންދުވާނެ ކަމަށެވެ.

މި މުއްދަތުގައި ފާމަސީތައް ބަންދުކުރި ނަމަވެސް، ކުއްލި ޙާލަތްތަކުގައި ބޭނުންވާ ބޭސް ފަސޭހަކަމާއެކު ލިބޭނެ އިންތިޒާމުތައް ހަމަޖައްސާފައިވާނެ ކަމުގެ ޔަގީންކަން އެސްޓީއޯ އިން ވަނީ ދީފައެވެ.

މި ބަދަލާއެކު، މީގެ ކުރިން އެސްޓީއޯ އިން ފޯރުކޮށްދެމުން އައި ފާމަސީގެ ޚިދުމަތްތަކާއި، ބޭހާއި މެޑިކަލް ސާމާނު ރާއްޖެއަށް އެތެރެކުރުމާއި، ބެލެހެއްޓުމުގެ އެންމެހައި މަސްއޫލިއްޔަތުތައް އުފުލާނީ ސްޓޭޓް ފާމާ އިންނެވެ.

ސްޓޭޓް ފާމާ އުފައްދާފައިވަނީ ރާއްޖޭގެ އެކި ކަންކޮޅުތަކަށް ބޭހާއި ސިއްހީ ސާމާނު ފޯރުކޮށްދިނުމުގެ ނިޒާމު ހަރުދަނާކޮށް، ފަސޭހަކަމާއެކު މި ޚިދުމަތްތައް ރައްޔިތުންނަށް ފޯރުކޮށްދިނުމުގެ މަޤްޞަދުގައެވެ. މީގެ އިތުރުން ޤައުމީ ފެންވަރުގައި ބޭސް ރައްކާކޮށް ފެތުރުމުގެ ވިއުގަ ވަރުގަދަކުރުމަކީވެސް އެ ކުންފުނީގެ މުހިންމު އަމާޒެކެވެ.

އެސްޓީއޯ އިން މަސައްކަތް ކުރަމުންދަނީ އަންނަ ޖުލައި މަހުގެ 1 ވަނަ ދުވަހުގެ ނިޔަލަށް ފާމަސީތަކުގެ ހުރިހާ ޚިދުމަތްތަކެއް ސްޓޭޓް ފާމާގެ ދަށަށް ބަދަލުކޮށް ނިންމުމަށެވެ.