ރިޔާސީ އިންތިހާބާ މަޖިލިސް އިންތިހާބު އެއްކޮށްލަން ތާއީދު، 130 މިލިއަން ރުފިޔާ ސަލާމަތްވާނެ - އީސީ
އެންމެ ބޮޑު ދެ އިންތިހާބުކަަމުގައިވާ ރިޔާސީ އިންތިހާބާ މަޖިލިސް އިންތިހާބު އެއްކޮށް ބާއްވަން ތާއީދުކަމަށް އީސީން ބުނެފިއެވެ.
ރާއްޖޭގައި ބާއްވާ އެންމެ ބޮޑު ދެ އިންތިހާބު ކަމަށްވާ ރިޔާސީ އިންތިހާބާ މަޖިލިސް އިންތިހާބު އެއްކޮށްލަން ތާއީދުކަމަށާއި އަދި އެކަމުގެ ސަބަބުން 130 މިލިއަން ރުފިޔާ ސަލާމަތްވާނެ ކަމަށް އީސީން ބުނެފިއެވެ.
އިލެކްޝަން ކޮމިޝަންގެ މަސައްކަތްތަކާ ގުޅޭ ގޮތުން މައުލޫމާތު ދިނުމަށް މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް ވަޑައިގެން މެންބަރުންގެ ސުވާލުތަކަށް ޖަވާބުދެއްވަމުން ކޮމިޝަނުގެ ރައީސް ފުއާދު ތައުފީގު ވިދާޅުވީ މިހާރު އިންތިހާބުތަކަށް ކުރަމުންދާ ވަރަށް ގިނަ ހަރަދުތައް އެއްކޮށްލެވި ދެބައިކުޅަ އެއްބައި ހަރަދު ކުޑަކުރެވޭނެ ކަމަށެވެ.
ވަރަށް ގިނަ ޚަރަދުތައް އެއްކޮށް ކުރުމުގެ ސަބަބުން ގާތްގަނޑަކަށް ހާފަށް [ޚަރަދު] ކުޑަވެގެންދާނެ، ފުއާދު ވިދާޅުވި އެވެ.
މީގެ އިތުރުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ ރިޔާސީ އިންތިހާބާއި މަޖިލިސް އިންތިހާބު އެއްކޮށްލައިގެން ބޭއްވުމަށް ގާނޫނުއަސާސީއަށް ގެންނަންޖެހޭ އިސްލާހުތައް ގެނައުމަށް މި ދައުރުގައި ހުށަހަޅުއްވާނެކަން އިއުލާން ކުރައްވާފައެވެ.
އެކޮމިޝަނުން ހާމަކުރެއްވި ގޮތުގައި ނިމިދިޔަ ދެ އިންތިހާބުގައި ޖުމުލަ 200 މިލިއަން ރުފިޔާ ހަރަދުވެފައިވެއެވެ. އެގޮތުން 200 މިލިއަން ރުފިޔާގެ ތެރެއިން 120 މިލިއަން ރުފިޔާ ހަރަދުވެފައިވަނީ މަޖިލީސް އިންތިހާބަށެވެ. އަދި 180 މިލިއަން ރުފިޔާ ހަރަދުވެފައިވަނީ ރިޔާސީ އިންތިހާބަށް ކަމަށް އެކޮމިޝަނުން ހާމަކުރެއްވިއެވެ.
ރައީސް މުއިއްޒު ވަނީ މަޖިލީސް މެންބަރުންގެ އިތުރުން ލޯކަލް ކައުންސިލުތަކުގެ މެންބަރުންގެ އަދަދުވެސް މަދުކުރެއްވަން ހުށަހަޅާނެ ކަމަށް ވިދާޅުވެފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
