އީ.ސީ.އާރް.އެފް.އެސް ޕްރޮޖެކްޓްގެ ދަށުން މުޙްޔިއްދީން ސްކޫލުގައި ދަނޑުވެރިކަމުގެ ތަމްރީނު ޕްރޮގްރާމެއް ކުރިއަށް ގެންގޮސްފި

މޫސުމަށް އަންނަ ބަދަލުތަކަށް ހޭނުމާއި ކާނާގެ ރައްކާތެރިކަން ކަށަވަރުކުރުމަށް ކުރިއަށްގެންދާ "އެންހޭންސިންގ ކްލައިމެޓް ރެޒިލިއަންސް އެންޑް ފުޑް ސެކިއުރިޓީ" (އީ.ސީ.އާރް.އެފް.އެސް) ޕްރޮޖެކްޓުގެ ދަށުން ހިންގާ #VilunVeshi ސްކޫލް ގާޑަން ޕްރޮގްރާމުގެ ތެރެއިން މުޙްޔިއްދީން ސްކޫލުގައި ތަމްރީނު ޕްރޮގްރާމެއް ކާމިޔާބުކަމާއެކު ބާއްވައިފިއެވެ.

މި ޕްރޮގްރާމަކީ މޫސުމަށް އަންނަ ބަދަލުތަކާ ގުޅޭގޮތުން ދަނޑުވެރިކަން ކުރުމުގެ ޢަމަލީ ހުނަރުތައް ދަރިވަރުންނާއި ސްކޫލުގެ މުވައްޒަފުންނަށް ދަސްކޮށްދިނުމުގެ މަޤްޞަދުގައި ކުރިއަށް ގެންދިޔަ ތަމްރީނެކެވެ.

މި ތަމްރީނުގައި ބައިވެރިން ވަނީ ހައިޑްރޯޕޮނިކްސް ވާޓިކަލް ޓަވަރު ސިސްޓަމްތައް ބޭނުންކޮށްގެން ކޮޕީފަތާއި، ޗައިނީޒް ކެބެޖް އަދި ކޮތަނބިރި ފަދަ ތަކެތި ހައްދާނެ ގޮތްތައް ޢަމަލީ ގޮތުން ދަސްކޮށްފައެވެ. މީގެ އިތުރުން، ކޮމްޕޯސްޓް އެއްކޮށްގެން ގަސް އިންދާނެ ބިންގަނޑު ތައްޔާރުކުރުމާއި، އެކި ބާވަތްތަކުގެ މޭވާ ގަސް އިންދައިގެން ވެލީގައި ދަނޑުވެރިކަން ކުރާނެ ގޮތުގެ ތަޖުރިބާވެސް ބައިވެރިންނަށް ވަނީ ފޯރުކޮށްދީފައެވެ.

މި ހަރަކާތުގައި ދަރިވަރުން ވަރަށް ފޯރިއާއި ޝައުޤުވެރިކަމާއެކު ބައިވެރިވެ، އަމިއްލައަށް ކާނާ ހައްދަން ދަސްކުރުމުގެ އުފާ ހޯދާފައިވެއެވެ. ޢަމަލީ ގޮތުން ކަންކަން ކޮށްގެން އުނގެނުމަށް ލިބުނު މި ފުރުޞަތު ދަރިވަރުން ވަނީ ނުހަނު އުފަލާއެކު ބަލައިގެންފައެވެ.

އީ.ސީ.އާރް.އެފް.އެސް ޕްރޮޖެކްޓުން މަޢުލޫމާތު ދޭ ގޮތުގައި، މި ސްކޫލުގައި ޤާއިމުކުރެވުނު ހައިޑްރޯޕޮނިކްސް އަދި ވެލީގައި ގަސް ހައްދާ ސިސްޓަމްތައް ކާމިޔާބުކަމާއެކު ހިންގައި، ބެލެހެއްޓުމަށް ބޭނުންވާ ފަންނީ އެހީތެރިކަން އެ ޕްރޮޖެކްޓުގެ ފަރާތުން މެދުކެނޑުމެއްނެތި ފޯރުކޮށްދެމުން ގެންދާނެއެވެ.