ސަބްސްކްރިޕްޝަން ޕޭމަންޓްތަކަށް އެއްވެސް ހުރަހެއް ނެތް: ބީއެމްއެލް
ބޭންކް އޮފް މޯލްޑިވްސް (ބީއެމްއެލް) މެދުވެރިކޮށް ދައްކާ ސަބްސްކްރިޕްޝަން ފީތަކަށް އެއްވެސް ބަދަލެއް ގެނެސްފައި ނުވާނެ ކަމަށާއި، އެފަދަ ފައިސާ ދެއްކުމުގައި ދަތިތަކެއް ދިމާވާނަމަ ބޭންކަށް އެންގުމަށް ބީއެމްއެލްއިން މިއަދު އެދިއްޖެއެވެ.
ގައުމީ ބޭންކުން ހާމަކުރި ގޮތުގައި، އެކި ކަންކަމަށް ކަނޑައަޅާފައިވާ މަހުފީ ނުވަތަ ސަބްސްކްރިޕްޝަން ޕޭމަންޓްތަކަކީ ކާޑުތަކުގެ ދުވަހުން ދުވަހަށް ކަނޑައަޅާފައިވާ ފޮރިން ސްޕެންޑް ލިމިޓުގެ ތެރޭގައި ހިމެނޭ މުޢާމަލާތްތަކެއް ނޫނެވެ. އެހެންކަމުން އެފަދަ ޕޭމަންޓްތައް ބޭންކުން ހިފަހައްޓާފައި ނުވާނެ ކަމުގެ ޔަގީންކަން ބޭންކުން ދެއެވެ.
ނަމަވެސް، ތަފާތު ސަބަބުތަކާހުރެ ބައެއް މާޗަންޓުން ސަބްސްކްރިޕްޝަން ޕޭމަންޓްތައް ބަލައިނުގަނެ ރިޖެކްޓް ކުރަމުންދާކަން ފާހަގަކުރެވިފައިވާ ކަމަށް ބީއެމްއެލްއިން ބުނެފައިވެއެވެ. މީގެ ތެރޭގައި މުނިފޫހިފިލުވުމާއި، ތައުލީމީ އަދި އެހެނިހެން ޚިދުމަތްތަކަށް ދައްކާ ފައިސާ ހިމެނެއެވެ.
ބީއެމްއެލްއިން އިތުރަށް ބުނީ، އެއްވެސް ކަސްޓަމަރެއްގެ ސަބްސްކްރިޕްޝަން ޕޭމަންޓެއް ދެއްކުމުގައި ދަތިތަކެއް ދިމާވެއްޖެނަމަ، ލަސްނުކޮށް ބޭންކާ ގުޅުމަށެވެ. އަދި އެފަދަ މައްސަލަތަކަށް ވަގުތުން ހައްލު ހޯދައިދޭނެ ކަމުގެ ޔަގީންކަންވެސް ބޭންކުން ވަނީ ދީފައެވެ.
މި ދުވަސްވަރަކީ ބޭރު ފައިސާގެ މުއާމަލާތްތަކަށް ބަދަލުތަކެއް އަތުވެދާނެ ކަމުގެ ކަންބޮޑުވުން އާންމުންގެ މެދުގައި އޮތް ވަގުތެއް ކަމުން، ބޭންކުން މި ހާމަކުރި މައުލޫމާތާއެކު ގިނަ ކަސްޓަމަރުންނަށް ލުއިތަކެއް ލިބިގެންދާނެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
