މަނީ ލޯންޑަރިިންގެ ކުށް ސާބިތުވެ ބައްސާމަށް އިތުރު 5 އަހަރުގެ ޖަލު ހުކުމެއް

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ފީފާއިން ދިން ފައިސާތަކަކަށް ޚިޔާނާތްތެރިވި މައްސަލައިގެ އިތުރަށް، މަނީ ލޯންޑަރިންގެ ކުށް ސާބިތުވުމާއެކު ބައްސާމް ޢަދީލް ޖަލީލު އިތުރު 5 އަހަރަށް ޖަލަށްލުމަށް ކްރިމިނަލް ކޯޓުން ހުކުމްކޮށްފިއެވެ.

މި މައްސަލާގައި ޖޫރިމަނާގެ ގޮތުގައި ދައުލަތަށް ބައްސާމް ދައްކަން ޖެހޭ ފައިސާ 154،000 ރުފިޔާއެވެ.

އެފްއޭއެމްގެ ރައީސްގެ މަގާމު ފުރުއްވަމުން ގެންދިޔައިރު ފީފާއިން ދިން ފައިސާގެ ތެރެއިން 10،000 ޑޮލަރު އަމިއްލަ އެކައުންޓަށް ޖަމާކޮށް ބޭނުންކުރި މައްސަލާގައެވެ. ބޭންކް ޗާޖްސްތައް ކެނޑުމަށް ފަހު އޭނާގެ އެކައުންޓަށް ޖަމާވެފައިވަނީ 9،999 ޑޮލަރެވެ.

މީގެކުރިން ފީފާއިން ދިން ފައިސާއަށް ޚިޔާނާތްތެރިވުމުގެ ދައުވާ އޭނާގެ މައްޗަށް ސާބިތުވާކަމަށް ކަނޑައަޅައި، ކްރިމިނަލް ކޯޓުން 4 އަހަރުގެ ޖަލު ހުކުމެއް އިއްވާފައިވެއެވެ. 

ޚިޔާނާތްތެރިވުމާއި މަނީލޯންޑަރިންގެ އިތުރުންވެސް ބައްސާމުގެ މައްޗަށް ތުހުމަތު ކުރެވޭ ކޮރަޕްޝަނުގެ މައްސަލަތައް އެބަހުއްޓެވެ. އެގޮތުން އަމީން އެވެނިއުއިން ޕެންޓްހައުސް ގަތުމާއި ފުޓްބޯޅަ އިދާރާގެ ފައިސާއާއި މުދަލަށް ހިޔާނާތްތެރިވިކަމުގެ ތުހުމަތު އޭނާގެ މައްޗަށް ކުރެއެވެ.