ތެލެސީމިއާ ކުދިންގެ ބޯންމެރޯ ޓްރާންސްޕްލާންޓަށް ޒަކާތު ފަންޑުން 2.5 މިލިއަން ރުފިޔާ ދޫކޮށްފި
ތެލެސީމިއާ ބައްޔަށް ފަރުވާ ހޯދަމުންދާ ކުދިންގެ ތެރެއިން ބޯންމެރޯ ޓްރާންސްޕްލާންޓް ހަދަންޖެހޭ ކުދިންނަށް އެހީތެރިވުމުގެ ގޮތުން، ޒަކާތު ފަންޑުން 2.5 މިލިއަން ރުފިޔާ ދޫކޮށްފިއެވެ.
މޯލްޑިވްސް ޒަކާތު ހައުސްއިން ހާމަކޮށްފައިވާ ގޮތުގައި، މި ފައިސާ މިދިޔަ އާދީއްތަ ދުވަހު ވަނީ ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އާ ހަވާލުކޮށްފައެވެ. މިއީ ތެލެސީމިއާ ކުދިންނަށް ބޭނުންވާ ފަރުވާގެ ކަންކަން ފަހިކޮށްދިނުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން ދެވުނު އެހީއެކެވެ.
މި މާލީ އެހީއަކީ 21 ފެބުރުވަރީ 2024 ގައި މިނިސްޓްރީ އޮފް އިސްލާމިކް އެފެއާޒް އަދި މިނިސްޓްރީ އޮފް ހެލްތާ ދެމެދު ސޮއިކުރެވުނު ފަހުމުނާމާގެ ދަށުން ދޫކުރެވުނު ފައިސާއެކެވެ. އެ އެއްބަސްވުމުގެ ދަށުން، ކޮންމެ އަހަރަކު ވެސް ތެލެސީމިއާ ކުދިންގެ ބޯންމެރޯ ޓްރާންސްޕްލާންޓް ހެދުމަށް ބޭނުންވާ މާލީ އެހީތެރިކަން ޒަކާތު ފަންޑުން ފޯރުކޮށްދިނުމަށް ވަނީ ހަމަޖެހިފައެވެ.
ޒަކާތު ފަންޑުން ތެލެސީމިއާ ކުދިންގެ ބޯންމެރޯ ހެދުމަށް އެހީތެރިކަން ފޯރުކޮށްދެމުން އަންނަނީ 2014 ވަނަ އަހަރުން ފެށިގެންނެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ޚާއްޞަ އިސްކަމެއް ދެއްވައިގެން، ތެލެސީމިއާ ކުދިންނަށް ދައުލަތުގެ ހިލޭ އެހީގައި ބޯންމެރޯ ހެދުމުގެ ފުރުޞަތު މިހާރު ވަނީ އިތުރަށް ފުޅާކުރައްވާފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
