ގދ. ތިނަދޫ ޑރ. އަބްދުއްސަމަދު މެމޯރިއަލް ހޮސްޕިޓަލުގައި ފުރަތަމަ ފަހަރަށް ކާމިޔާބު އަންހެނުންގެ ޚާއްޞަ ސާޖަރީއެއް ހަދައިފި

ގދ. ތިނަދޫ ސިޓީގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލުގައި، އަންހެނުންގެ ބަލިތަކާ ގުޅޭ ޚާއްޞަ ސާޖަރީއެއް ފުރަތަމަ ފަހަރަށް ކާމިޔާބުކަމާއެކު ނިންމާލައިފިއެވެ.

މި ސާޖަރީއަކީ މިނިސްޓްރީ އޮފް ހެލްތާއި، ފެމިލީ އެންޑް ސޯޝަލް އެފެއާޒް އަދި ޑރ. އަބްދުއްސަމަދު މެމޯރިއަލް ހޮސްޕިޓަލް ގުޅިގެން ކުރިއަށްގެންދިޔަ މެޑިކަލް ކޭމްޕެއްގެ ތެރެއިން ކުރެވުނު މަސައްކަތެކެވެ. މި ކޭމްޕުގައި ޖުމްލަ 10 ސްޕެޝަލިސްޓް ޑޮކްޓަރުންގެ ޓީމަކުން ބައިވެރިވެވަޑައިގެންފައިވެއެވެ.

ހޮސްޕިޓަލުން މަޢުލޫމާތު ދެއްވި ގޮތުގައި، މި އޮޕަރޭޝަނުގައި ކޮށްފައިވަނީ ބަނޑުގެ ވާތްފަރާތު އޯވަަރީގައި އުފެދިފައިވާ ސިސްޓެއް ނެގުމާއި، ފެލޯޕިއަން ޓިއުބުގައި ހުރި ފައިބްރޯމާއެއް ނެގުމުގެ މަސައްކަތެވެ.

މި ތާރީޚީ ސާޖަރީ ކުރިއަށް ގެންގޮސްފައިވަނީ ޑރ. އުބައިދު ޢަބްދުﷲ ގެ އިސްނެންގެވުމުގެ ދަށުންނެވެ. މި މަސައްކަތުގައި ޑރ. އާމިނަތު ނުޞްރާ، ޑރ. ޖުމައިލަތު ބޭގަމް، ޑރ. އަސަދު މުޙައްމަދު، ޑރ. މުޙައްމަދު އަމީން ޙާމިދު، ޑރ. މުޙައްމަދު ޙަމްޒާ، އަދި ޑރ. މަޙްމޫދު ސައްޔިދު އަޙްމަދު މުޙައްމަދު ސަޢުދު ބައިވެރިވެވަޑައިގެންފައިވެއެވެ.

މި އޮޕަރޭޝަނަކީ ލެޕަރޮސްކޯޕިކް ނުވަތަ ކޮމްޕިއުޓަރުގެ އެހީގައި ކުދިކުދި ބޯގަނޑު އަޅައިގެން ކުރާ ސާޖަރީއެކެވެ. މިގޮތަށް ކުރެވޭ އޮޕަރޭޝަންތަކަކީ އާދައިގެ އޮޕަރޭޝަންތަކާ ޚިލާފަށް ބޮޑުކޮށް ކޮށާލަން ނުޖެހޭ، ތަދު ކުޑަ އަދި ބަލިމީހާ އަވަހަށް ފަސޭހަވާ ކަމެއްގެ ގޮތުގައި ފާހަގަކުރެވެއެވެ. މިއީ އާންމުކޮށް އޯވަރީގެ ސިސްޓްތަކާއި، ފައިބްރޮއިޑްސް އަދި އެންޑޯމެޓްރިއޯސިސް ފަދަ ބަލިތަކަށް ފަރުވާ ދިނުމަށް ބޭނުންކުރާ ޒަމާނީ ގޮތެކެވެ.

ޑރ. އަބްދުއްސަމަދު މެމޯރިއަލް ހޮސްޕިޓަލުގެ އޮފިޝަލުން ވިދާޅުވި ގޮތުގައި، މިއީ އެ ހޮސްޕިޓަލުން ދެމުންގެންދާ ޞިއްޙީ ޚިދުމަތްތައް ފުޅާކޮށް، ކުރިއެރުވުމަށް އެޅުނު ވަރަށް މުހިންމު ފިޔަވަޅެކެވެ. މީގެ ސަބަބުން އެ ސަރަހައްދުގެ ރައްޔިތުންނަށް ރަށުގައި ތިބެގެން ފެންވަރު ރަނގަޅު ޞިއްޙީ ފަރުވާ ލިބުމަށް މަގުފަހިވެގެންދާނެއެވެ.