މި މީހާގެ އުމުރު އެނގުމުން ގަބޫލުކުރަން ދަތިވާނެ: "އުމުރުން ދުވަސްނުވާ" ޓަންގެ ސިއްރަކީ ކޮބައި؟

ސިންގަޕޫރުގެ މަޝްހޫރު ފޮޓޯގްރާފަރު އަދި ކުރީގެ މޮޑެލް ޗުއަންޑޯ ޓަންގެ ފޮޓޯތަކެއް އަލުން ސޯޝަލް މީޑިއާގައި ދައުރުވާން ފަށައި، ގިނަ ބަޔަކު ހައިރާންކޮށްލައިފިއެވެ. ޓަން އަލުން ވައިރަލްވެފައިވަނީ އޭނާގެ އުމުރުން 60 އަހަރު ފުރިފައިވާކަން އެނގުމުން، އޭނާގެ ޒުވާން ސިފައާ މެދު އުފެދުނު ބަހުސްތަކަކާ ގުޅިގެންނެވެ.

މިކަން އަލުން ވައިގައި ހިފައިގެން ދިޔައީ އެކްސް ބޭނުންކުރާ ފަރާތަކުން ޓަންގެ ފޮޓޯތަކެއް ހިއްސާކޮށް، "މި ފިރިހެންމީހާގެ އުމުރުން 60 އަހަރު، އަދިވެސް މިހާ ޒުވާންކޮށް ފެންނަނީ ކިހިނެއް؟ އޭނާގެ ސިއްރަކީ ކޮބައި؟" ކަމަށް ބުނެ ކުރި ޕޯސްޓަކާ ގުޅިގެންނެވެ. މި ޕޯސްޓަށް ކުޑަވަގުތުކޮޅެއްގެ ތެރޭގައި މިލިއަންތަކުން ވިއުސް ލިބިފައިވާއިރު، ސޯޝަލް މީޑިއާ ޔޫޒަރުން އަންނަނީ އޭނާއަކީ "އުމުރުން ދުވަސް ނުވާ މީހެއް" އަދި އޭނާ ފެންނަ ގޮތަކީ "އަންރިއަލް" ނުވަތަ ގަބޫލުކުރަން ދަތި ކަމެއްގެ ގޮތުގައި ސިފަކުރަމުންނެވެ.

ބައިނަލްއަގްވާމީ މީޑިއާ ރިޕޯޓްތައް ބުނާ ގޮތުގައި، ޓަންގެ މި ޒުވާން ސިފަ ބެލެހެއްޓުމުގެ އަސްލަކީ އޭނާ ގެންގުޅޭ ހަރުދަނާ ދިރިއުޅުމުގެ އާދަކާދަތަކެވެ. އޭނާގެ ލައިފްސްޓައިލްގައި ޑައިޓް، ގަވާއިދުން ކުރާ ކަސްރަތު، ހަމަނިދި އަދި ނަފްސާނީ ދުޅަހެޔޮކަމަށް ނުވަތަ ސްޓްރެސް މެނޭޖްމަންޓަށް ބޮޑު ސަމާލުކަމެއް ދެއެވެ.

ޓަންގެ ކެއުމުގެ އާދަކާދައަށް ބަލާއިރު، އޭނާ ފޮލޯ ކުރަނީ ޕްރޮޓީން ގިނަ ޑައިޓެކެވެ. އޭނާގެ ކާނާގައި ބިސް، ކުކުޅު، މަސް، ތަރުކާރީ، އޯޓްމީލް އަދި މޭވާ ހިމަނާއިރު، ޕްރޮސެސްޑް ކާނާ އާއި ހަކުރު ގިނަ ބުއިންތަކާ ދުރުހެލިވެއެވެ. އަދި އިސްލާމީ އުސޫލުތަކާވެސް އެއްގޮތްވާ ގޮތުގެ މަތިން، އޭނާއަކީ ބަނގުރާ އަދި ދުންފަތުގެ އިސްތިއުމާލު ކުރުމުން މުޅިން ދުރުހެލިވެފައިވާ މީހެކެވެ. އޭނާ ގަބޫލުކުރާ ގޮތުގައި ސިއްހަތުގެ 70 އިންސައްތައަކީ ކެއުމެވެ. ބާކީ 30 އިންސައްތައަކީ ކަސްރަތެވެ.

ފިޓްނަސްއަށް ބަލާއިރު، ޓަން ހަފްތާއަކު ތިން ފަހަރާއި ފަސް ފަހަރާ ދެމެދު ކަސްރަތު ކުރެއެވެ. މީގެ ތެރޭގައި ސްޓްރެންތް ޓްރެއިނިން އާއި ފެތުން އަދި ކާޑިއޯ ހިމެނެއެވެ. މީގެ އިތުރުން ރޭގަނޑު 11 ޖެހުމުގެ ކުރިން ނިދުމާއި، މާގިނައިން އަވީގައި ނޫޅުމަކީވެސް އޭނާގެ ހަމުގެ ދުޅަހެޔޮކަމަށްޓަކައި ކުރާ ކަންކަމެވެ.

ނަމަވެސް، މި ހުރިހާ ސަމާލުކަމަކާ ގުޅިގެން ޓަން ބުނެފައިވަނީ އޭނާ ފެންނަނީ "އާދަޔާ ޚިލާފު" ޒުވާން ގޮތަކަށް ކަމަށް އޭނާ ގަބޫލުނުކުރާ ކަމަށެވެ. އޭނާ ބުނާ ގޮތުގައި އޭނާއަކީ ހަމައެކަނި "ސިއްޙަތަށް ރަނގަޅު 60 އަހަރުގެ މީހެއް" ކަމަށެވެ.

މީގެ އެތައް އަހަރެއް ކުރިން ފުރަތަމަ އިންޓަނެޓް ސެންސޭޝަނަކަށް ވީ ޓަން، މިއަދުވެސް ވަނީ ދުނިޔޭގެ އެކި ކަންކޮޅުތަކުން ގިނަ އަދަދެއްގެ ފޮލޯވަރުން ހޯދާފައެވެ. ގިނަ ބަޔަކު އަދިވެސް އަންނަނީ އޭނާގެ ފިޓްނަސް އާއި ސްކިންކެއާ އާދަތަކާ ބެހޭގޮތުން ސުވާލުކޮށް، އޭނާގެ ފަރާތުން ނަމޫނާ ލިބިގަންނަމުންނެވެ.