ޒުވާން އާބާދީ ކުރިއެރުވުމަށް ސަރުކާރުން ދަނީ އިސްތިރާޖީ މަސައްކަތްތަކެއް ކުރަމުން: ޢާއިޝަތު ޝިހާމް

ދިވެހިރާއްޖޭގައި ޒުވާނުންގެ ބޮޑު އާބާދީއެއް މިވަގުތު އެބައޮތްކަމަށާއި، ސަރުކާރުން ދަނީ ޒުވާން އާބާދީގެ ބޭނުން ފުރިހަމަޔަށް ކުރުމަށް ރޭވުންތެރިކަމާއެކު އިސްތިރާޖީ މަސައްކަތްތަކެއް ކުރަމުންކަމަށް އިޖުތިމާއީ އަދި އާއިލީ ތަރައްގީއާއި ބެހޭ ވުޒާރާގެ ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ.

މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން ކުރިއަށް ގެންދިޔަ 11 ވަނަ ފައިނޭންސް ފޯރަމްގައި ވާހަކަފުޅު ދައްކަވަމުން ވަޒީރު ވަޒީރު ޑރ. ޢާއިޝަތު ޝިހާމް ވިދާޅުވީ ހެޔޮވެރިކަމާއި، ދެފުށްފެންނަ ސިޔާސަތެއްގެ ތެރެއިން އިޤުތިޞާދީ، އިޖުތިމާޢީ އަދި އީޖާދީ މަގުޗާޓާއެކު، ޒުވާން އާބާދީ ކުރިއެރުވޭނެ ހިތްވަރު ސަރުކާރުގައި ހުރިކަމަށެވެ.

ޒުވާން މަސައްކަތްތެރިން ކުރިއަރުވާ، އެ ފަރާތްތަކަށް ބޭނުންވާ މަސައްކަތްތެރިކަމުގެ ހުނަރު ތަރައްގީކުރެވޭނެ ގޮތްތައް ރާވައި، ޒުވާނުންނަށް ފަހި ވަޒީފާގެ ފުރުސަތުތަކުގެ ތެރެއިން އިޤްތިޞާދީ ދުވެހި ހަލުވިކޮށް، ޒުވާނުންނަކީ މާލީގޮތުން ޒިންމާދާރުވެރި، މަސައްކަތްތެރި އަދި ގައުމީ ކުރިއެރުމަށް މަސައްކަތްކުރާ ބަޔަކަށް ހެދިދާނެ ކަމަށް ވަޒީރުގެ ވާހަކަފުޅުގައި ފާހަގަކުރެއްވިއެވެ.

އެއާއެކު، އެކަމަނާ ވިދާޅުވީ، ރާއްޖޭގައި އޮތް ޒުވާން އާބާދީ ކުރިއެރުވުމަށް ސަރުކާރުން މިހާރު ވެސް ރޭވުންތެރިކަމާއެކު، އިސްތިރާޖީ މަސައްކަތްތަކެއް ކުރަމުން ގެންދާކަމަށެވެ.

ވަޒީރު ވިދާޅުވީ ޒުވާނުންނަކީ މިއަދުގެ ލީޑަރުންކަމަށެވެ. އަދި އެމީހުންގެ ވަޒީފާއަށްޓަކައި ސަރުކާރުން އިސްނަގައިގެން ކުރިއަށް ގެންދާ މަސައްކަތްތަކީ، ވަޒީފާގެ ފުރުސަތުތަކަށް ހިތްގައިމު ފުރުސަތުތައް ހޯދައިދިނުމުގެ އަމާޒުގައި ކުރާ މަސައްކަތްތަކެއްކަން ވަޒީރު ފާހަގަކުރެއްވިއެވެ. އަދި ވިދާޅުވީ އޭގެ ސަބަބުން ޤައުމުގެ އިޤްތިޞާދާއި އިޖްތިމާއީ ފޭރާމަށް ތަފާތު ބޮޑު ބަދަލުތަކެއް އަންނާނެކަން ޔަގީންކުރައްވާކަމަށެވެ.

ދިވެހިރާއްޖޭގެ ދެމެހެއްޓެނިވި ތަރައްޤީއަށް، ޒުވާން އާބާދީގެ ބޭނުން ފުރިހަމަގޮތުގައި ހިފުމުގެ މުހިންމުކަމަށް ވަޒީރުގެ ވާހަކަފުޅުގައި އަލިއަޅުވާލައްވާފައިވާއިރު، އެކަމަނާ ވަނީ ރާއްޖޭގެ އާބާދީއަށް އަންނަމުން މިދާ ބަދަލުތަކަށް ދުރާލާ ތައްޔާރުވުމުގެ މުހިންމުކަން ވެސް ފާހަގަކުރައްވާފައެވެ.