ގަވަރުނަރު ކަމަށް ފިނޭންސް މިނިސްޓަރުގެ އެޑްވައިޒަރު މުނައްވަރު އައްޔަންކުރަން ފާސްކޮށްފި

މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު ކަމަށް ފިނޭންސް މިނިސްޓަރުގެ އެޑްވައިޒަރު އަހުމަދު މުނައްވަރު އައްޔަންކުރަން ރައްޔިތުންގެ މަޖިލީހުން ރުހުންދީފިއެވެ.

މަޖިލީހުގެ ލަފާގެ މަތިން މަރުކަޒީ ބޭންކްގެ ގަވަރުނަރަކަށް ހުންނެވި އަލީ ހާޝިމް މަގާމުން ވަކިކުރުމަށް ފަހު އެ މަގާމަށް މުނައްވަރު އައްޔަންކުރަން ރައީސް ޑރ. މުހައްމަދު މުއިއްޒު މަޖިލީހަށް ފޮނުއްވީ މިދިޔަ ހަފުތާގައެވެ.

މުނައްވަރު މިމަގާމަށް އައްޔަނުކުރުމަށް ރުހުން ލިބިފައިވަނީ މިއަދުގެ ޖަލްސާގައި އެކަމާ މެދު ގޮތެއް ނިންމަން ނެގި ވޯޓުގައި ބައިވެރިވެވަޑައިގެންނެވި 78 މެންބަރުންގެ އިއްތިފާގުންނެވެ.

ރައްޔިތުން މަޖިލީހުގެ ނައިބު ރައީސް އަހުމަދު ނާޒިމް ވަނީ މުނައްވަރު އެ މަގާމަށް އައްޔަންކުރަން އެވްރެޖްކޮށް 70 އަށްވުރެ ގިނަ މާކްސް ލިބުނުކަން ފާހަގަކުރައްވައި އެ ގޮތަށް ފާސްކުރަން ހުށަހަޅުއްވައިފައެވެ. މީގެ އިތުރުން މާލިއްޔަތު ކޮމިޓީން އިއްޔެ މުނައްވަރު ގަވަރުނަރު ކަމަށް އައްޔަނުކުރަން ރުހުން ދިންއިރު، އިއްޔެ އެ ކޮމިޓުގެ ބައްދަލުވުމުގައި މާލިއްޔަތު ކޮމިޓީގެ މެމްބަރުން މުނައްވަރާއި އިންޓަވިއު ކުރެއްވުމަށްފަހު އެވްރެޖް 94.73 އިންސައްތަ މާކްސް ވަނީ ދެއްވާފައެވެ. އެބޭފުޅާ އަކީ ގަވަރުނަރު ކަމަށް ގާބިލު ބޭފުޅެއް ކަމަށްވާތީ އެމްއެމްއޭގެ ގަވަރުނަރަކަށް ކަނޑައެޅުއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒަށް ލަފާ އެރުވުމަށް ކޮމިޓީން ވަނީ ފާސްކޮށްފައެވެ.

ގަވަރުނަރުކަމުގައި ކުރިން ހުންނެވި އަލީ ހާޝިމް މަގާމުން ވަކިކުރަން ރައީސް މުއިއްޒު ނިންމެވީ މިދިޔަ އަންގާރަ ދުވަހުއެވެ. އަދި ރައީސް މުއިއްޒު، ގަވަރުނަރުކަމަށް މުނައްވަރު އައްޔަންކުރުމަށް އެ މަނިކުފާނު ވަނީ ނަން ފޮނުއްވައިފައެވެ.