މާލޭ ކޮމާޝަލް ހާބަރުން ގިނަ އަދަދެއްގެ ވޭޕް ކާޓްރިޖްތަކެއް ކަސްޓަމްސްއިން އަތުލައިގަނެފި

މާލޭ ކޮމާޝަލް ހާބަރަށް ކަނޑުމަގުން ރާއްޖެ ގެނައި މުދާ ޝިޕްމެންޓެއްގައި ގާނޫނާއި ގަވާއިދާ ހިލާފު ތަކެތި ހުރިކަމަށް ޝައްކުކުރެވިގެން ހިންގި ހާއްސަ އޮޕަރޭޝަނެއްގައި، ގިނަ އަދަދެއްގެ ވޭޕް ކާޓްރިޖްތަކެއް ކަސްޓަމްސްއިން އަތުލައިގަނެފިއެވެ.

މި މަހުގެ 17 ވަނަ ދުވަހު މާލޭ ކޮމާޝަލް ހާބަރުގައި ކަސްޓަމްސްއިން މި އޮޕަރޭޝަން ކުރިއަށް ގެންގޮސްފައިވަނީ، ރާއްޖެއަށް އެތެރެކުރި ޝިޕްމެންޓެއްގައި ރަނގަޅު ނޫން މުދާތަކެއް ހުރިކަމަށް ކަސްޓަމްސްގެ އިންޓެލިޖެންސަށް ލިބުނު މައުލޫމާތަކާ ގުޅިގެންކަމަށް ކަސްޓަމުން ބުންޏެވެ.

ކަސްޓަމްސްއިން ހާމަކޮށްފައިވާ ގޮތުގައި، މި ތަކެތި ފެނިފައިވަނީ "ޖެނެރަލް ކާގޯ" ގެ ގޮތުގައި ޑިކްލެއާކޮށް އެތެރެކުރި ޝިޕްމަންޓެއް ބަލައި ފާސްކުރުމުގެ ތެރޭގައެވެ. އެ ޝިޕްމަންޓުގެ ތެރޭގައި ވަރަށް ބޮޑަށް ފޮރުވާފައި ހުރި 5,600 ވޭޕް ކާޓްރިޖް ފެނިފައިވާ ކަމަށް ކަސްޓަމްސްއިން މައުލޫމާތު ދެއެވެ.

މި މުދާތައް މިހާރު ހުރީ ކަސްޓަމްސްގެ ބެލުމުގެ ދަށަށް ގެނެވިފައެވެ. އަދި ގަވާއިދާ ހިލާފަށް މި ތަކެތި އެތެރެކުރަން އުޅުނު މައްސަލަ ކަސްޓަމްސްއިން ދަނީ އިތުރަށް ތަހުގީގު ކުރަމުންނެވެ.

ރާއްޖެއަށް ސިއްރުން މުދާ އެތެރެކުރުން ހުއްޓުވުމަށްޓަކައި ކަސްޓަމްސްއިން އަންނަނީ ހާއްސަ ފިޔަވަޅުތަކެއް އަޅަމުންނެވެ. މިގޮތުން ބަނދަރުތަކަށް ގެންނަ މުދާ ޗެކްކުރުމާއި، އިންޓެލިޖެންސް މައުލޫމާތަށް ބިނާކޮށް ހިންގާ އޮޕަރޭޝަންތައް މިހާރު ވަނީ އިތުރަށް ވަރުގަދަކޮށްފައެވެ.