ހަސަން ޒަރީރަށް ފިނޭންސް މިނިސްޓަރު ކަމަށް މަޖިލީހުން ރުހުންދީފި

މިނިސްޓަރ އޮފް ފައިނޭންސްގެ މަޤާމަށް ހަސަން ޒަރީރު އައްޔަންކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުށަހެޅުއްވި ހުށަހެޅުއްވުމަށް ރައްޔިތުންގެ މަޖިލީހުން މިއަދު ރުހުން ދީފިއެވެ.

ޖޫން މަހުގެ 8 ވަނަ ދުވަހު މި މަޤާމަށް އައްޔަންކުރެއްވި ހަސަން ޒަރީރުގެ ނަންފުޅު މަޖިލީހަށް ހުށަހެޅުއްވީ ޤާނޫނުއަސާސީގައިވާ ގޮތުގެ މަތިން މަޖިލީހުގެ ރުހުން ހޯއްދެވުމަށެވެ. މި ނަންފުޅު ދިރާސާކުރި ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން އެމަނިކުފާނަށް ރުހުން ދިނުމަށް އިއްތިފާޤުން ނިންމާފައިވާއިރު، މަޖިލީހުގެ ތަޅުމުން މި ނަންފުޅު ފާސްކުރީ ވޯޓުގައި ބައިވެރިވެވަޑައިގެންނެވި 49 މެންބަރުންގެ އިއްތިފާޤުންނެވެ.

ހަސަން ޒަރީރަކީ މީގެ ކުރިން މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމާއި، ޑެޕިއުޓީ ކޮމިޝަނަރ ޖެނެރަލްގެ މަޤާމު ފުރުއްވާފައިވާ ތަޖުރިބާކާރު ބޭފުޅެކެވެ. ތަޢުލީމީ ދާއިރާއަށް ބަލާއިރު، އެމަނިކުފާނު ވަނީ އިންޓަރނޭޝަނަލް އިސްލާމިކް ޔުނިވަރސިޓީ މެލޭޝިއާ (އައި.އައި.ޔޫ.އެމް) އިން އެކައުންޓިންގ ދާއިރާއިން ފުރަތަމަ ޑިގްރީ އަދި ފައިނޭންސްގެ ދާއިރާއިން މާސްޓަރސް ޑިގްރީ ޙާޞިލުކުރައްވާފައެވެ.