އޭޕީއޭޕީ ރޯޑްމެޕް މިނިސްޓަރު ތަޢާރަފުކޮށްދެއްވައިފި

އޭޝިއާ ޕްރޮޓެކްޓެޑް އޭރިއާ ޕާޓްނަރޝިޕް (އޭޕީއޭޕީ) ރޯޑްމެޕް މިނިސްޓަރު ތަޢާރަފުކޮށްދެއްވައިފިއެވެ.

މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް އެނަރޖީ އޮނަރަބަލް ޠާރިޤު އިބްރާހިމް، އޭޝިއާ ޕްރޮޓެކްޓެޑް އޭރިއާ ޕާޓްނަރޝިޕް (އޭޕީއޭޕީ) ރޯޑްމެޕް ފޯރ އަދަރ އިފެކްޓިވް އޭރިއާ ބޭސްޑް ކޮންޒަރވޭޝަން މެޝަރސް (އޯއީސީއެމް) ތަޢާރަފުކޮށްދެއްވައިފިއެވެ.

މި ރޯޑްމެޕް ތަޢާރަފުކޮށްދެއްވީ މިއަދު ބޭއްވުނު ރީޖަނަލް ކޮންސަރވޭޝަން ފޯރަމް 2024 އޭޝިއާގެ ތެރެއިންނެވެ. މި ފޯރަމަކީ އިންޓަރނޭޝަނަލް ޔޫނިއަން ފޯރ ކޮންޒަރވޭޝަން އޮފް ނޭޗަރ (އައިޔޫސީއެން) އާއި އައިޔޫސީއެން މޯލްޑިވްސްގެ އެހީތެރިކަމާއެކު ބޭއްވުނު ފޯރަމެކެވެ.

އޭޕީއޭޕީ ރޯޑްމެޕްގެ މަޤްޞަދަކީ އޭޝިއާ ސަރަޙައްދުގައި ދެމެހެއްޓެނިވި ގޮތެއްގައި ޤުދުރަތީ ވަސީލަތްތައް ބޭނުންކުރުމާއި، ތިމާވެށި ރައްކާތެރިކުރުމަށް ކުރެވޭ މަސައްކަތްތައް ހަރުދަނާކުރުމެވެ. މީގެ އިތުރުން، މި ރޯޑްމެޕްގެ ސަބަބުން އޭޝިއާގެ ޤައުމުތަކުގެ މެދުގައި ތިމާވެށި ރައްކާތެރިކުރުމަށް ކުރެވޭ މަސައްކަތްތަކުގައި އެއްބާރުލުން އިތުރުވެގެންދާނެ ކަމަށް ބެލެވެއެވެ.

މިނިސްޓަރ ޠާރިޤު ވިދާޅުވީ މި ރޯޑްމެޕްގެ ސަބަބުން ދިވެހިރާއްޖޭގެ ތިމާވެށި ރައްކާތެރިކުރުމަށް ކުރެވޭ މަސައްކަތްތަކަށް އިތުރު ބާރެއް ލިބިގެންދާނެ ކަމަށެވެ. އަދި މި ރޯޑްމެޕްގެ ސަބަބުން އޭޝިއާގެ އެހެން ޤައުމުތަކާއެކު ގުޅުން ބަދަހިވެ، ތަޖުރިބާ ޙިއްޞާކުރުމުގެ ފުރުޞަތު ލިބިގެންދާނެ ކަމަށްވެސް ވިދާޅުވިއެވެ.