ބީއެމްއެލް މެދުވެރިކޮށް ރާއްޖެއިން ބޭރަށް ފޮނުވި ފައިސާގެ އަދަދު ބޮޑުތަނުން އިތުރުވެއްޖެ

ބޭންކް އޮފް މޯލްޑިވްސް (ބީއެމްއެލް) މެދުވެރިކޮށް އާންމު ފަރުދުންނާއި ވިޔަފާރިތަކަށް ބޭރު ފައިސާ ފޯރުކޮށްދޭ މިންވަރު ފާއިތުވި އަހަރާ އަޅާބަލާއިރު މިއަހަރު އިތުރުވެފައިވާކަން އެ ބޭންކުގެ ތަފާސްހިސާބުތަކުން ހާމަވެއްޖެއެވެ.

ބީއެމްއެލްއިން އާންމުކޮށްފައިވާ މައުލޫމާތުތަކަށް ބަލާއިރު، ރާއްޖެއިން ބޭރަށް ފައިސާ ފޮނުވުމަށާއި ބޭރު ގައުމުތަކުގައި ކުރާ ކާޑުގެ މުއާމަލާތްތަކަށް ވިއްކާފައިވާ ޑޮލަރުގެ އަދަދު ވަނީ ފާހަގަކޮށްލެވޭ މިންވަރަކަށް މަތިވެފައެވެ. އެގޮތުން 2025 ވަނަ އަހަރުގެ މުޅި އަހަރު ދުވަހު ބޭންކުން ވިއްކާފައިވަނީ 566 މިލިއަން ޑޮލަރެވެ. މިއީ މަހަކަށް އެވެރެޖްކޮށް 47 މިލިއަން ޑޮލަރެވެ. ނަމަވެސް، 2026 ވަނަ އަހަރުގެ މޭ މަހުގެ ނިޔަލަށް އެކަނިވެސް 345 މިލިއަން ޑޮލަރު ވަނީ ވިއްކާފައެވެ. މިއީ މަހަކަށް އެވެރެޖްކޮށް 69 މިލިއަން ޑޮލަރެވެ.

ވިޔަފާރިތަކަށް ބޭނުންވާ މުދާ ރާއްޖެއިން ބޭރުން ގެނައުމަށް ޑޮލަރު ވިއްކި މިންވަރަށް ބަލާއިރު، 2025 ވަނަ އަހަރު ވިއްކާފައިވަނީ 175 މިލިއަން ޑޮލަރެވެ. އެއީ މަހަކު އެވެރެޖްކޮށް 15 މިލިއަން ޑޮލަރެވެ. އެހެންނަމަވެސް، 2026 ވަނަ އަހަރުގެ ފުރަތަމަ ފަސް މަސް ދުވަހުގެ ތެރޭގައި (މޭ މަހުގެ ނިޔަލަށް) 147 މިލިއަން ޑޮލަރު ވަނީ ވިއްކާފައެވެ. މިއީ މަހަކަށް އެވެރެޖްކޮށް 29 މިލިއަން ޑޮލަރެވެ.

މީގެ އިތުރުން، ޑެބިޓް އަދި ކްރެޑިޓް ކާޑު މެދުވެރިކޮށް ހިންގާ މުއާމަލާތްތަކަށް ބޭންކުން ފޯރުކޮށްދިން ޑޮލަރުގެ އަދަދުވެސް ވަނީ އިތުރުވެފައެވެ. 2025 ވަނަ އަހަރު މި ކަމަށް 390 މިލިއަން ޑޮލަރު (މަހަކު 33 މިލިއަން ޑޮލަރު) ހޭދަވެފައިވާއިރު، 2026 ވަނަ އަހަރުގެ މޭ މަހުގެ ނިޔަލަށް 198 މިލިއަން ޑޮލަރު ވަނީ ހޭދަވެފައެވެ. މިއީ މަހަކަށް އެވެރެޖްކޮށް 40 މިލިއަން ޑޮލަރެވެ.

ބޭންކުގެ ތަފާސްހިސާބުތަކުން ދައްކާ ގޮތުގައި 2026 ވަނަ އަހަރުގެ މޭ މަހުގެ ނިޔަލަށް ބޭރު ފައިސާގެ އެހީތެރިކަން ފޯރުކޮށްދީފައިވާ ޖުމްލަ ޓީޓީ ގެ އަދަދަކީ 45,764 އެވެ.

މި ތަފާސްހިސާބުތަކުން ހާމަވަނީ ރާއްޖޭގެ އިޤްތިސާދީ މުއާމަލާތްތަކަށާއި އާންމުންގެ ބޭނުންތަކަށް ބޭރު ފައިސާ ބޭނުންވާ މިންވަރު އަހަރަކަށް ވުރެ އަހަރެއް އިތުރުވަމުންދާ ކަމެވެ.