ތިނަދޫ އާބާދީއާ ގުޅޭގޮތުން ޞައްޙަ ނޫން މަޢުލޫމާތު ޙިއްޞާކޮށްފައިވާ މައްސަލަ ޕީޖީއަށް

ތިނަދޫ އާބާދީއާ ގުޅޭގޮތުން އިދާރާތަކަށް ޞައްޙަ ނޫން މަޢުލޫމާތު ޙިއްޞާކޮށްފައިވާ މައްސަލަ ޕްރޮސެކިއުޓަރ ޖެނެރަލް (ޕީޖީ) އޮފީހަށް ހުށަހަޅައިފިއެވެ. 

ޕީޖީ އޮފީހަށް ދައުވާކުރަން ފޮނުވީ ތިނަދޫ މޭޔަރު ސައުދު އަލީ އަށެވެ. އޭނާގެ މައްޗަށް ދައުވާ ކުރަން ފޮނުވީ ގދ. ތިނަދޫ ކައުންސިލުން އެރަށަށް ސިޓީއެއްގެ ދަރަޖަ ހޯދުމަށް ދައުލަތުގެ ކަމާގުޅުން ހުރި އިދާރާތަކަށް ގދ. ތިނަދޫ އާބާދީއާއި ގުޅޭގޮތުން ޞައްޙަ ނޫން މަޢުލޫމާތު ޙިއްޞާކޮށްފައިވާކަމަށް ތުޙުމަތު ކުރެވޭ މައްސަލަައިގައެވެ. 

 އެ މައްސަލާގައި ދައުވާކުރުމާމެދު ގޮތެއް ނިންމުމުގެ ކުރިން ހަދަންޖެހޭ ދިރާސާތައް ހެދުމުގެ މަސައްކަތް ޕީޖީ އޮފީހުން ވަނީ ފަށާފައެވެ.

ސައުދުއަށް ދައުވާ ކޮށްދިނުމަށް ޕީޖީ އޮފީހަށް ފޮނުވާފައިވާއިރު، ރަށުގެ އާބާދީ އޮޅުވާލިކަމުގެ ތުހުމަތުގައި ސައުދު ޕޮލިހަށް ހާޒިރުކުރިއެވެ. މީގެ އިތުރުން އެންޓި ކޮރަޕްޝަން ކޮމިޝަން (އޭސީސީ) އިން ތިނަދޫ ކައުންސިލަށް ވަދެ، ބައެއް ލިޔުންތައް ވެސް ކުރިން ގެންދިޔައެވެ. 

ތިނަދު އަށް ސިޓީއެއްގެ ދަރަޖަ ދިނީ 2023 ވަނަ އަހަރުގެ ރިޔާސީ އިންތިހާބު ގާތްވެފައި ވަނިކޮށް އޭރުގެ ރައީސް އިބްރާހިމް މުހައްމަދު ސޯލިހް ނެރުއްވި ގަރާރަކުންނެވެ. 

ލާމަރުކަޒީ ގާނޫނު އޮންނަ ގޮތުން ސިޓީއެއްގެ ދަރަޖަ ދެވޭނީ މަދުވެގެން 10،000 މީހުންގެ އާބާދީ އޮންނަ ރަށްރަށަށް ކަމަށް ވާއިރު، އޭރު ތިނަދޫގެ އާބާދީއަކީ 8،000 ކަމަށް ތުހުމަތުކޮށް، ބައެއް މީހުން އެ މައްސަލަ ހުށަހެޅި އެވެ.